ಬಹುರೂಪಿ

ಅಗೋ ಅಲ್ಲೊಂದು
ಚಿನ್ನದ ತೇರು
ಹೂವಿನ ಸಿಂಗಾರ
ಮೇಳಗಳ ಝೇಂಕಾರ
ಪಂಜುಗಳ ಪಹರೆ
ಅರ್ಚನಾದಿಗಳಿಂದ ಅಲಂಕೃತ
ತೇಜಸ್ವಿಯಾದ ಮೂರ್ತಿ
ಗುಂಪುಗುಂಪಾದ ಜನಗಳು

ಇಗೋ ಇಲ್ಲೊಂದು
ಮನದ ತೇರು
ಸಿಂಗಾರವಿಲ್ಲ
ಝೇಂಕಾರವಿಲ್ಲ
ಪಹರೆಯಿಲ್ಲ
ಅಲಂಕಾರವಿಲ್ಲ
ಅದರದೇ ತೇಜಸ್ವಿ
ಇಲ್ಲಿ ನಾನೊಬ್ಬಳೆ

ಕಣ್ಣೆದುರಿನ ದೈವವು
ಮನದೊಳಗಿನ ಇವನು
ಇಬ್ಬರಿಗೂ ಮೆರವಣಿಗೆ
ತೆರೆಯಲ್ಲಿ ಒಬ್ಬರು
ಮರೆಯಲ್ಲಿಯೊಬ್ಬರು

ನೆಚ್ಚಿ ಮೆಚ್ಚಿ ನಾ
ಕಣ್ಮುಚ್ಚಿ ನೆನೆದು
ಕೈಮುಗಿದು ನಡದೆ
ಬಹುರೂಪಿ ನಿನೆಲ್ಲರೋಳಗಿರುವವನೆಂದು!!
-ಶೃತಿ

ಮನಸ್ಸು ನೆರೆದಾಗ.!!

ಮನಸ್ಸು ನೆರೆದಾಗ
ಮಜ್ಜಿಗೆಯ ಹುಳಿ,
ಕಾಡುತಿವೆ ಅಮ್ಮನ ತುತ್ತು,
ಮರೆತ ಮುತ್ತು

ಬಾಲ್ಯ ಇನ್ನು ಕನಸಂತೆ,
ಮನದ ತುಂಬಾ ಚಿಂತೆಗಳ ಸಂತೆ
ಬರೀ ಸ್ವಾರ್ಥದ  ಜಾಗಟೆ,
ಹಣದ ತಮಟೆಯ ಸದ್ದು

ಸ್ಥಾನ ಮಾನಗಳ  ಗುದ್ದಾಟ
ತೃಪ್ತಿ  ಅತೃಪ್ತಿಗಳ ಎಳೆದಾಟ ,ಸೆಳೆದಾಟ
ಭಾವ ಸ್ಮಶಾನದಲ್ಲಿ ಅಲೆದಾಟ
ಆಗಾಗ ಉಮ್ಮಳಿಸುವ  ದುಃಖ
ಕಣ್ಣೋರಿಸಿದ  ಕೈಗಳ ನೆನಪು

ಸಂಬಂಧಗಳೆಲ್ಲ ಬೇಡಿಗಳೆನಿಸಿ,
ದ್ವಂದ್ವಗಳ ,ದೈವದಾಟಗಳ
ಹೊಕ್ಕು ಹೊರ ಬರುವಮುನ್ನ
ಆತ್ಮ ಸಂವಿಧಾನದಲ್ಲಿ ಹಲವು ತಿದ್ದುಪಡಿ

ಆಸೆ ಕನಸುಗಳ ಒತ್ತುವರಿ,
ಹುಡುಕುತ್ತಲೊಂದು ಗೊತ್ತುಗುರಿ
ಕಾಣುವ ಮುಂಚೆ ಭಾವಸ್ರಾವ!!
-ಶೃತಿ

ಹೋಗುವ ಮುನ್ನ .....!

 

ಸರಿದಿವೆ ಹೆಜ್ಜೆಗಳು
ಸರದಿಯಿಂದ
ಸೇರುವ ಬಯಕೆ
ಸುರಿವ ಮುಸ್ಸಂಜೆಯ
ಮಳೆಯಲ್ಲಿ ಕೊಚ್ಚಿಹೋಗಿದೆ

ಆಡದೆ ಉಳಿದ
ಅಮೂರ್ತ ಭಾವಗಳು
ಅಜ್ಞಾತವಾಗಿ,
ಅಳಿಸಿ ಹೋಗಿದೆ

ಕಲ್ಲು ಬಂಡೆಯಂತವಳು ನಾನು
ಕೋಟಿ ಉಳಿಪೆಟ್ಟಿಟ್ಟರು
ಕದಲಲಾರೇನು,
ಮೂಕ ಪ್ರಾಣಿನೊಂದರು
ಮರಗುವ ಮನಸ್ಸು
ನಿನ್ನದೆಂದು ಬಲ್ಲೆನು

ನಾ ಇಟ್ಟ ಹೆಜ್ಜೆಗಳೆಲ್ಲ
ಅಳಿಸಿ ಹೋಗಿಬಿಡಲಿ
ಅರಸದಿರು ನನ್ನ
ಪ್ರೀತಿ ಬಡಿಸಿದ್ದೇನೆ,
ಬಂದ ಬಿಡಿಸಿದ್ದೇನೆ
ಹೋಗಿ ಬರುವೆನೆಂದು ಹೇಳಲಾರೆನು
ಕಾರಣ
ನಾ ಮರೆಯಾಗುವ  ಸಮಯ
ಗ್ರಹಣವಲ್ಲ ಪಾಣಿಗ್ರಹಣ!!!!
-ಶೃತಿ

ಇದು ಬಿಸಿಲನಾಡಿನ ಭಾವಗೀತೆ
ಇಲ್ಲಿ ,,
ಬಿಸಿಲಿನ ಝಳ
ಬಿರಿದಿಹ ಭೂಮಿ
ಬಳಲಿದ ದೇಹಗಳು
ಬಾಗಿದ ಬೆನ್ನುಗಳು
ಒಣಗಿದ ಮರಗಳು

ಹನಿ ನೀರಿಗೆ ಪರಿತಪಿಸುವ
ಬಾಯಿಗಳು,ಬಾವಿಗಳು
ಬೋಳು ಮರಗಳು
ದಾಹವನೀಗದೆ ಕಂಗೆಟ್ಟ
ಜಾನುವಾರಗಳು

ಬಸಿಯುತ್ತಿರುವ ಬೆವರು
ತಿರುಗುತ್ತಿರುವ ಕಣ್ಣುಗಳು
ಕಾದ ಹಂಚಿನ ಮನೆಗಳು
ಕಂಡ ಕಂಡವರ ಮನೆಯ
ಹೊಂಡ,ಕೊಂಡಗಳಲ್ಲಿ
ಕಣ್ಣು ಹಾಕುವ ಪಕ್ಷಿಗಳು

ಇಲ್ಲಿ ಬದುಕು ಬರ್ಬರ
ಬಡವರಿಗೆ ಮಾತ್ರ,
ಸಿರಿವಂತರಿಗೆ ಎಸಿ ರೂಮ್,ಮಿನರಲ್ ವಾಟರ್
ಇನ್ನು ದುಡಿವವರ ಪಾಡನು
ಕೇಳದಿದ್ದರೆ ಲೇಸು

ಬರವನ್ನು ಅಪ್ಪಿ ಕುಳಿತ
ಭೂತಾಯಿಯ ಮನವನೋಲಿಸಲು
ಬರಬಾರದ ಒಮ್ಮೆ ಮಳೆರಾಯ?
-ಶ್ರುತಿ

 

ಕಡೆಗೆ ನಿನ್ನ ಜಾತಿಗಾದರು ನ್ಯಾಯ ಮಾಡು ಮಾನವ!!!

ಮನದ ಕೊಳೆಯ ತೊಳೆವ
ಮಡಿವಾಳ,
ತೊರೆದ ಮನಸುಗಳ ಹೊಲೆಯುವ
ದರ್ಜಿ ,

ಅಂದದ ಆಲೋಚನೆಗಳ ಹದ ಮಾಡಿ
ರೂಪ ಕೊಡುವ ಕುಂಬಾರ,
ಆತ್ಮಕ್ಕೆ ಲಿಂಗವನ್ನು ಧರಿಸಿ
ಪೂಜಿಸುವ ಜಂಗಮ,

ಅಕ್ಷರ ಜ್ಞ್ಯಾನ ದಾನ ಮಾಡುವ
ಬ್ರಾಹ್ಮಣ,
ಸ್ನೇಹ,ಪ್ರೀತಿಯನ್ನು ಕೊಡು ಕೊಳ್ಳುವ
ವೈಶ್ಯ ,
ಅರಿಷಡ್ವರ್ಗಗಳೊಂದಿಗೆ ಹೋರಾಡುವ
ಕ್ಷತ್ರಿಯ,
ಅಸಾಹಯಕರ ಸೇವೆಗೈಯುವ
ಶೂದ್ರ ,
ದುಶ್ಚಟ ಮತ್ತು ದುರಾಲೋಚನೆಗಳಿಗೆ
ಅಸ್ಪೃಶ್ಯನಾಗಿ
ಕಡೆಗೆ ನಿನ್ನ ಜಾತಿಗಾದರು ನ್ಯಾಯ ಮಾಡು ಮಾನವ!!!
-ಶ್ರುತಿ

ಮೊದಲ ಹೆಜ್ಜೆ...........!

ಎಲ್ಲೊ ಮೊಳುಗುತಿಹ ಮೇಳ..!!

ಎಲ್ಲೊ ಮೊಳುಗುತಿಹ ಮೇಳ
ಕದಡುತಿದೆ ನನ್ನೆದೆಯ ತಾಳ
ಹಾಕಬೇಕೆಂದರೆ ನಾಲ್ಕು ಅಕ್ಷತೆ ಕಾಳ
ದ್ವೇಷ ,ದಳ್ಳುರಿಯ ಕೋಳ!

ಶಕುನಿಗಳು ಹಲವರು ಷಡ್ಯಂತ್ರ ನೂರು
ಒಡಹುಟ್ಟಿದವರಲ್ಲಿ ಸ್ವಾರ್ಥ ಸಾದನೆಗಾಗಿ
ಬಿತ್ತಿದ ಬೀಜ ಇಂದು ಮೊಳಕೆ ಒಡೆದು ಮರವಾಗುತಿದೆಯೆಂದು
ಪಾನಕದಲ್ಲಿ ಅದ್ದಿದಂತ ಮುಖಗಳನು ಹೊತ್ತು ತಿರುಗುತಿದ್ದಾರೆ ಅವರೆಲ್ಲ!

ಕಾಲಚಕ್ರನ ಅಡಿಗೆ ಬೀಳದವರು ಯಾರು
ಮಾಡಿದ್ದೂ ಉಣಬೇಕು,ಕರೆದಾಗ ನಡಿಬೇಕು
ಇರುವುದರೊಳಗೆ ಇಬ್ಬರನು ನಗಿಸುತ
ಒಡೆದ ಮನಸುಗಳ ಬೆಸೆಯುತ ಬಾಳಿ ನೋಡು!
-ಶ್ರುತಿ